Хойд Солонгосын цэргүүд Ням гаригаас хойш хилийн Кэсон хотод Өмнөд Солонгосын суурилуулж байсан цахилгааны шугамыг тасалсныг Сөүл мэдэгдлээ. Кэсон дахь хамтарсан аж үйлдвэрийн цогцолборыг цахилгаанаар хангах зорилгоор уг шугамыг анх суурилуулж байжээ. Гэвч энэхүү аж үйлдвэрийн цогцолбор нь өдгөө ажиллахаа больсон тул цахилгаан дамжуулалт нь ч зогссон гэсэн үг. Тэгэхээр цахилгааны шугам тасалж буй нь бэлгэдлийн чанартай үйлдэл юм.

Кэсон аж үйлдвэрийн цогцолбор 2004 онд хоёр улсын эдийн засгийн хамтын ажиллагаа болон эвлэрлийн төслийн хүрээнд нээлтээ хийж байжээ. Гэвч 2016 онд Хойд Солонгос улс пуужин харвасан тул Өмнөдийн тал цогцолборын үйл ажиллагааг зогсоосон байна.

Умардын удирдагч Ким Жон Ун өнгөрсөн оны сүүлээр Өмнөдийг дайсагнагч улс гэж тодорхойлсон билээ. Үүний дараа хоёр улсын хурцадмал байдал улам нэмэгдэж, нэгдлийг илэрхийлэх аливаа бэлгэ тэмдгүүдийг устгах болсон. Тухайлбал, Хойд Солонгос хилийн Кёнгүй, Дунхэгийн зам дагуух гэрэлтүүлгийг буулгах, мина суурилуулах, Цэрэггүй бүстэй зэргэлдээ танк эсэргүүцэх хаалт барих зэрэг арга хэмжээ авчээ. Улмаар өнгөрсөн сард Хойд Солонгосын нутаг дэвсгэрийг Өмнөдөөс бүрэн тусгаарлах төлөвлөгөөгөө зарлаж, хилийн авто замуудыг дэлбэлжээ.